要睇一個人嘅樣，生得好唔好，主要係睇個鼻，如果個鼻生得靚，咁都唔會醜得去邊。同樣，如果個鼻生得又直又挺，鼻頭又有肉嘅話，咁佢嘅人生，亦一樣唔會點差，而今日就同大家講吓鼻樑有節嘅相會係點。
鼻樑中間嘅位置，有處鼻骨零舍凸起嘅，有相書話呢種鼻叫羅馬鼻，因為好多羅馬人都有呢種鼻，查實完全冇關係。至於鼻樑有節，主要係講為人意志力堅強，個性執着，做事絕不放棄，往往一言既出，駟馬難追，決定咗嘅事就冇妥協嘅餘地。
坊間好多大美人都有呢種鼻，佢哋事業相當成功，唯獨愛情運麻麻。原來古相書講，有呢種鼻嘅女性，婚姻大多數會失敗收場，係孤寡之相，其實主要原因就係妻子個性太強，如果選擇另一半時，搵啲個性溫順啲嘅老公，就可以防止婚姻出現問題嘞！