講到用繩，我哋中國人其實都算威威，就以簡簡單單去街市買餸為例，商販阿叔往往能夠將一條鹹水草運用得出神入化，綁豬肉又得，綁海鮮又得，綁得實淨之餘，仲速度驚人，真係令人嘆為觀止。不過，近年小弟最佩服嘅就係海鮮檔老闆，因為佢哋轉用比往時更粗壯嘅鹹水草，將隻蟹綁到冇得郁，呃秤技巧固然令小弟驚訝，但係咁都綁得四平八穩實在係手藝驚人！
然而，外國嘅綑綁技術近年亦進步神速，足以媲美我國！我冇吹水㗎！大家若然親身去到德國慕尼黑，參觀過佢哋嘅綑綁博覽會（BoundCon），就知道綑綁唔單止得個綁字，而且仲可以成為一門高深藝術，受盡讚賞添！
天王示範
呢個綑綁博覽會今年已經係第六屆舉行，而今屆嘅場館更加係歷屆最大規模嘅一個，因為場地足足佔五千平方米，仲吸引超過三萬人次到場參與添。入到綑綁博覽會，大家只會喺表演舞台上見到一種節目，就係表演綑綁藝術喇！其實，綑綁呢家嘢唔單止係用繩將一個人綁到實一實，當中實在包含好深奧嘅學問。例如繩結要係生結，輕輕一解就可以令被綁者重獲自由；綁繩嘅時候要注意力度，唔可以令被綁者感到劇痛，條繩當然亦唔可以綁得過緊，否則被綁者唔係痛死，就係抖唔到氣而一命嗚呼。
此外，綑綁表演仲有好多變化，譬如將一個美女綁好之後，仲要將佢成個人吊起，而被綁嘅美女仲可以談笑自若。如果再高深啲，仲可以將兩個美女綁埋一齊，令佢哋變成連體大閘蟹！至於咁高深嘅學問，由邊個嚟表演呢？補習界有補習天王，綑綁界同樣都有天王，佢哋個個都係大師級人馬，一執起條繩就知道如何運用，點樣左搭右搭，將美女綁到成件藝術品一樣，唔怪得每年綑綁博覽會都有咁多人到來觀摩啦！
規矩多多
綑綁博覽會容許大家一邊睇一邊學，自由度高到冇人有，但係入到場其實都仲有好多規則要遵守，咁先唔會打直行入去，畀人打橫抬番出嚟。而當中嘅規則包括只容許入場人士作適當裸露，千祈唔可以全裸，因為大會雖然有好多美女露兩點表演，但係講到底都唔係色情博覽，光脫脫咁見人成何體統！
另外，大會除咗教授綑綁之外，亦有教授使用皮鞭嘅技術，不過規矩係只批准表演嘉賓用鞭，其他人若然被發現揸住條鞭亂咁揮舞，一定會被逐出場外，因為大會係嚴禁暴力行為嘅。仲有就係表演綑綁嘅模特兒雖然大部分都又索又好身材，而且仲會半裸演出，但係大家若然想拍照留念，則敬請要問過佢哋先，因為每個模特兒都有所屬嘅公司，擁有佢哋嘅肖像權，若然亂咁影，分分鐘會畀人拆菲林㗎！
即場試綁
睇咗咁多天王示範，相信好多對綑綁藝術有興趣嘅朋友已經心癢癢，好想趕返屋企搵個人演練一番，改良手藝。不過，返屋企未有咁早，事關博覽會之內仲有好多地方值得一睇再睇㗎！場內設有好多豐富綑綁資訊嘅檔口，有賣綑綁藝術沙龍嘅檔位；亦有售賣綑綁用嘅專門道具，例如麻繩、皮帶、鐵環；更有售賣綑綁教材嘅Counter，當中更加有好多志願人士畀錢開檔表演自己嘅手藝，而示範嘅人物當然係佢本人啦！所以，入場人士可以睇到好多人將自己綁到成隻糉一樣，有部分更加會困自己入鐵籠。
不過大家又唔使擔心有得睇冇得玩喎，因為場內設有講座，由綑綁大師作深入淺出嘅講解，而且仲有少量美女模特兒可供租用，目的就係希望令入場人士可以即場學習實踐，而大師則從旁指導，令大家能夠即時加深印象。至於學完之後亦唔好咁急住趕返屋企，因為場內仲有一個無上裝酒吧，享受完先走都未遲啦！