大巨星鬥兜踎 坐監破產命仔都冇埋

泰臣 Tyson

衰啲乜：衰得嘅都衰晒咁滯……

抵死指數：5

強姦吸毒復出「咬耳仔」

泰臣喺1986年勇奪WBC金腰帶，成為史上最年輕重量級拳王後，87年再喺WBA及IBF連下兩城，成功將三大拳擊組織重量級金腰帶集於一身。正當事業如日方中，泰臣喺92年衰強姦被判監，坐完監後諗住喺拳壇重拾昔日光輝，點知偏偏遇着荷里菲特，爆出震驚拳壇嘅「咬耳仔」血腥事件，最後無復當年勇嘅佢喺2005年決定退出拳壇。

打拳袋23億 一樣使清光

泰臣職業生涯50勝6負，44次擊倒對手，2次對手棄權，戰績驕人唔在講，更為佢帶嚟約3億美元（約23億港元）收入。可惜年少得志嘅佢，盡過紙醉金迷嘅生活，終歸落得破產下場。泰臣退役後要靠喺拉斯維加斯打拳做騷還債外，之後喺亞利桑那州更因吸毒被捕，被檢控藏毒同藥駕，好在法官見佢有心改過，至避免再受獄之苦。

正所謂經一事、長一智，泰臣歷盡高低起伏後，近幾年已經修心養性，間唔中出席講座同商業活動搵銀，佢直言樂於過一啲簡樸生活：「我唔會話自己再冇飲酒，但我唔會再搞到畀警察拘捕。依家過住同修道士一樣嘅生活。」

佐治貝斯 George Best

衰啲乜：沉迷酒色

抵死指數：5

沉迷酒色 多病早逝

佐治貝斯可以話係北愛爾蘭史上最好波球員，雖然佢未踢過世界盃，但喺曼聯獲獎無數。可惜佢私生活勁唔檢點，沉迷酒精、女色等陋習不能自拔，84年仲試過因醉駕入獄3個月。佐治貝斯曾揚言：「喺1969年我試過放棄女人同酒精，呢個係我一生中最差嘅20分鐘。」又指承認自己使咗勁多錢喺酒、女人同跑車身上，其他都一一浪費咗。最終佢為此賠上足球事業，職業生涯後期更淪為人球轉戰各地。呢位傳奇球星喺2005年11月，因體內多個器官出現衰竭離世，終年59歲。

森莫蘭奴 Zamorano

衰啲乜：不擅理財

抵死指數：3

理財不善 銀行逼賣家產

呢名智利名宿曾經効力皇馬、國米等大球會，無論球會獎盃定個人獎項都攞唔少。佢喺96年加盟國米嗰陣，球會更畀佢250萬美元（約1,900萬港元）年薪，以當時嚟講可謂頂級待遇。可惜呢位射手不擅理財，退役後逐漸陷入經濟困境，最終畀銀行訴於法律行動變賣資產還債，包括住緊間大屋、14間公寓、靚車同其他名貴物件等通通冇晒。唯一令人欣慰嘅係，森莫蘭奴接受《Libero》訪問嗰陣話，已經搵到方法解決問題。

加斯居尼 Gascoigne

衰啲乜：酗酒

抵死指數：5

瘋狂酗酒 日隊4支白蘭地

加斯居尼曾被譽為英格蘭史上最具天分球員，18歲就帶領紐卡素勇奪英格蘭青年足總盃。無論喺熱刺定國家隊都有好表現，可惜傷患同酗酒令佢停滯不前，職業生涯晚年要遠走中國効力甘肅天馬。

47歲「老人」醉倒屋外

加斯居尼接受訪問承認，喺比賽前會狂隊白蘭地，最癲一日四支，頭兩支止手震，另外兩支頂酒癮。長期酗酒令佢健康近年急速惡化，一度接近死亡邊緣。佢上年到美國接受戒酒治療，但始終甩唔到酒癮，今年8月更試過醉倒屋外，折墮到畀房東下「逐客令」，差啲要瞓街做流浪漢。

加斯居尼依家先47歲，但酗酒多年令身體機能急速衰退。早前佢登上各大英國媒體封面，實在難以相信眼前老坑就係佢。

鍾絲 Jones

衰啲乜：服食禁藥

抵死指數：5

服禁藥褫奪3金踎監半年

美國前女飛人鍾絲，2000年悉尼奧運奪得3金2銅後，長時間被禁藥風波纏擾。雖然佢一直否認服用興奮劑，但到2007年終喺法庭認罪，除被褫奪悉尼奧運所有獎牌外，更被指控作假口供，雖然鍾絲變賣自己同媽咪嘅物業籌錢打官司，但最後都要坐監半年。已經退出田徑壇嘅佢，出獄後轉戰籃球壇搵食，但幾年前慘被球會放棄。

布林美 Brehme

衰啲乜：冇份工做得耐

抵死指數：4

搵唔到工 洗廁所還債

呢位喺1990年世盃決賽為西德射入12碼，擊敗阿根廷捧盃嘅日耳曼名將，估唔到要淪落到幫人洗廁所維生。據德國《德國之聲》報道，現年53歲嘅布林美自從06年畀史特加辭退助教一職後，就未試過搵到一份穩定收入，終欠下20萬歐元（約199萬港元）債項。依家佢全靠舊隊友史杜比「伸出援手」，請佢負責洗廁所還債過活。不過堂堂世盃冠軍隊成員淪為廁所大總管，史杜比都唔知係咪有心玩佢。

卡班拿斯 Cabanas

衰啲乜：一時衝動

抵死指數：1

頭部中槍 妻離子散

2010年1月正值卡班拿斯職業生涯高峰，同球會CF阿美利加簽新約，準備帶領巴拉圭挑戰南非世盃，得到新特蘭青睞有望轉戰英超。點知就喺呢個時刻，呢位前巴拉圭國腳喺墨西哥一間酒吧同人爭執，最後畀人槍擊頭部，從此經歷人生巨變。

酒吧爭執捱子彈 阿美利加拖糧千萬

據卡班拿斯老婆瑪莉亞所講，事發後佢哋畀CF阿美利加拖欠約130萬美元（約1,000萬港元）波糧，要搵墨西哥足總幫手追數。到卡班拿斯醒番後，除咗知道自己頭入面仲殘留部分子彈碎片攞唔番出嚟，成為健康隱患之外，更得悉老婆已經將兩個小朋友同埋成副身家都帶走，令佢一無所有。

好在卡班拿斯冇自暴自棄，喺槍擊事件後2年分別轉戰巴拉圭丙組同巴西丁組聯賽。依家佢已經重返家鄉，同父母一齊經營家族麵包店重過新生活。

柏賓 Pippen

衰啲乜：投資失利

抵死指數：3

生意失敗 唔見9.3億身家

芝加哥公牛名將柏賓，當年同米高佐敦喺NBA合作無間，為公牛6度奪得總冠軍，並協助美國隊連奪92及96年兩屆奧運金牌。雖然佢喺籃球壇空前成功，可惜轉戰商場頻頻損手，無論投資商務航空、建設度假村同飲食界都失敗收場，蒸發超過1.2億美元（約9.3億港元）身家，最終落得破產收場，早幾年兜踎到要去芬蘭籃球聯賽打波搵銀。

加連查 Garrincha

衰啲乜：長期酗酒

抵死指數：3

賣世盃金牌過活命喪貧民窟

綽號「小鳥」嘅巴西翼鋒加連查，雙腳天生帶有殘疾，雖然經治療後仍然長短腳，但照樣練得一身好腳法，盤球技術尤其出色，為「森巴兵團」1958年及1962年世界盃冠軍功臣之一。可惜加連查因腳患導致肌肉萎縮，被迫告別綠茵場，嗜酒如命嘅佢其後生活陷困，慘到要變賣世盃金牌過活，最後由於肝硬化死喺貧民窟之內，終年49歲。

韋利 Vieri

衰啲乜：投資失利

抵死指數：3

做生意破產 想教波搵食

意大利傳奇球星韋利，昔日球場上英姿颯爽，弊在退役後唔多掂，試過喺羅馬投資房地產被騙徒呃咗大筆錢，跟住喺米蘭投資家具公司，今年初又因經營不善破產。雖然法院判決指韋利唔使為此負責，但作為公司主要債權人，佢嗰幾百萬歐元資產全部付諸東流，血本無歸。喺商界撈唔掂嘅韋利，早前報讀教練課程，似乎計劃做番「老本行」，想教波搵餐飽飯食。