「你唔同我傾偈，我搵警察拉你！」估不到昨日採訪武術賽事，該館媒體經理竟將這句說話「付諸實行」，叫警察對付一位本港女記者，更發生肢體碰撞！「經理仔」，你影衰南韓人呀！

「經理仔」（右圖左二）

話說當記者正在傳媒區訪問失落獎牌的袁家鎣時，「經理仔」懶有型地想帶走袁家鎣，話要開記招。但我們解釋記招是用作訪問得獎健兒，袁家鎣當然無份，此舉已令「經理仔」無癮。之後「經理仔」企圖以阻礙運動員休息時間為由，想再次帶走袁家鎣，但此時袁家鎣即幫口說想接受訪問，更令「經理仔」下不了台。當訪問完成後，各行家正埋頭趕稿之際，「條氣唔順」的「經理仔」就一直騷擾本港一位女行家，該行家亦已強硬地表明不想跟他糾纏，需要趕稿、不再理會他。

「經理仔」惡人先告狀

於是，「經理仔」將行動升級，竟Call警察到場話有人搞事……「惡人先告狀」！一眾本港行家見到「經理仔」的「小學雞」行為，當然群起理論，問「經理仔」為甚麼叫警察，理虧的他竟然答了一句「因為佢唔同我講嘢」……愈講愈離譜的「經理仔」其後更動手動腳，最終當然是理虧離場！

出來工作，大家理應互相尊重，但永遠都有些人「揸住雞毛當令箭」，從不理會自己的工作性質是協助我們，而不是找我們麻煩。其實來到南韓後，已遇上不少來自賽會的不合理對待而令人氣結，不過大局為重，小記一般情況下都會吞聲忍氣，但昨日這件事，實在太「有趣」，不「些牙」不是人吧！