世事無絕對，以為NBA球員就一定球技出眾？未必！兩大湖人球星杜域侯活（Dwight Howard）及慈世平（Metta World Peace）日前分途出擊，各自單挑師奶、小朋友鬥射罰球，結果就齊齊出洋相，當中「超人」不但輸錢又輸面，更自爆因「恐罰症」要睇心理醫生，故此今夏決定對症下藥，拜師「黃金左手」穆連（Chris Mullin）！

鑑於侯活職業生涯罰球命中率不足58%，《洛杉磯時報》特別安排一場罰球大賽落「超人」面，並找來一位育有3名小孩的家庭主婦Kelly作對手。Kelly甫落場就以「唔知你係乜水」進行挑釁，侯活亦不甘示弱，表明用左手讓賽兼打賭5,000美元，奈何該名湖人球星講就天下無敵，最後10投僅得3中，不敵10射5中的師奶Kelly。

賽後侯活面燶燶自爆患「恐罰症」：「我個腦有問題，成日因為擔心射失罰球諗得太多，最近開始搵球會精神科醫生傾偈。」據「超人」透露，今夏將會拜訪勇士名將穆連惡補罰球，並計劃每日射夠1,000球提升命中率。

超人自爆患「恐罰症」

「超人」隊友慈世平亦一樣瘀爆，這位「壞孩子」前日唔識死，挑戰最近賽和高比拜仁（Kobe Bryant）及射贏奧尼爾（Shaquille O'Neal）的2歲「罰球神童」泰特斯（Titus）。慈世平甫落場4投3中後懶叻，連環施展左手投籃讓波，最終衰輕敵以6:11向泰特斯俯首稱臣，泰特斯亦延續與NBA球星鬥射罰球的不敗神話。