戴歷羅斯揸住拐杖溝女 喜愛喪蒲x2！

足、籃天之驕子喜愛夜蒲！曼城前鋒巴洛迪利同公牛王牌戴歷羅斯雖然年紀輕輕，但都分別喺各自領域呼風喚雨，奈何「腦殘」自歐國盃爆紅之後完全冇貨交，「牛魔王」亦因為膝部重創唔知幾時復出。偏偏兩位天之驕子就繼續唔生性，巴洛迪利前晚「打包」半打索女返歸Happy，戴歷羅斯行動不便都照蒲，一啲都唔自愛。

今個禮拜一先「率領」曼城隊友蒲吧嘅「腦殘」，畀英國《太陽報》周到前晚又再出動，呢位仁兄新季英超跌晒Watt，但場外表現就好鬼Sharp醒，當晚喺餐廳用咗短短一餐飯嘅時間，已經識咗3位着短裙嘅索女。巴洛迪利係英超球星，呢晚又泊住架名貴賓利喺餐廳門口，3位辣妹即時嗒晒糖跟咗佢上車，「上半場」已經大演「帽子戲法」。

1男3女之後轉戰Sakura酒吧，玩到凌晨2:30先鬆人，估唔到巴洛迪利溝女咁掂，入酒吧一轉又釣多3件索女，呢位曼城前鋒喺酒吧門口扯咗支煙之後，決定Call多架車載晒呢半打靚女返歸慢慢歎，煲煙、夜蒲加埋瘋狂溝女，領隊文仙尼肯定激到紮紮跳。

美媒插「牛魔王」影衰芝加哥

另一個衰仔戴歷羅斯亦非常蒲得，呢位2011年NBA常規賽MVP得主，自從上季尾接受完膝部手術之後一直喺洛杉磯養傷，到家陣連跑同跳呢啲簡單動作都未做到，但美媒《MediaTakeOut》繼上個月目擊「牛魔王」揸住拐杖落Club狂歡之後，《Tereowens》又喺前晚影到佢一拐一拐夜蒲，仲同1件金髮靚女打得火熱添！

消息指戴歷羅斯最快都要出年2月先復出，早排佢向《體育畫報》話自己訓練得好刻苦，睇嚟都係吹水居多，難怪美媒都話呢位控衞唔配做公牛Icon，影衰晒芝加哥球迷！