個個唔妥文仙尼等住睇佢死

富豪兵團曼城內部衝突嘅火頭一個接一個，繼日前爆出耶耶托尼同占士米拿球員通道嘈交後，又再有艾迪巴約比賽中途同隊友高柏尼對罵場面曝光。更加大鑊係，英國傳媒直指領隊文仙尼管治無方，已經喺更衣室徹底失去管治權力，家陣球隊眾星個個當佢透明，人人想佢死添！

曼城上周末聯賽意外不敵狼隊，目前喺英超排第4落後榜首車路士8分。球隊戰績未達預期，隨即爆出連串問題，就喺日前耶耶托尼同占士米拿嘈交後，尋日呢位前巴塞球星嘅經理人施隆卡更加火上加油咁話：「耶耶認為部分留隊已久嘅球員，根本係欠缺冠軍球員嘅心理質素，佢哋認為排第4已經係了不起成就，比賽時只係想唔輸多過想贏波。」

艾迪巴約高柏尼比賽嘈交

一波未平、一波又起，尋日英國《太陽報》再刊出一張前鋒艾迪巴約同守將高柏尼對罵相片。事緣當時係高柏尼侵犯對手被吹罰，該位多哥前鋒就鬧高柏尼亂咁犯規，後者則鬧番轉頭指係艾迪巴約喺前場無故失球在先，二人之後幾乎「開拖」，好彩多得耶耶托尼做和事老，先至冇大打出手。

隊波內訌不絕，歸根究柢咪又係管理無方。事實上，有曼城內部消息聲稱，領隊文仙尼根本盡失民心：「大家都唔鍾意佢嘅領軍風格，喺球員調動又往往令人莫名其妙。喺更衣室內根本冇人撐佢，大家冇話想邊個接掌球隊，但已經有唔少人喺度估緊佢幾時落台添！」

「多一鎊」策略爭奪費托

文仙尼喺「藍軍」帥位危危乎，球會董事局諗到嘅解決方法當然係繼續使錢搞掂啦！最新消息指，佢哋希望重提收購利物浦前鋒費蘭度托利斯建議：「佢哋已經同費托經理人傾過，話到明無論邊隊開價斟佢，曼城都會開出相對多出一鎊嘅收購聘約，總之一定要將佢收歸旗下。」只係搞唔掂內亂，買多多人都未必有用呢！