自從同騎士約滿成為自由身後，奧尼爾曾同鷹隊扯上關係，不過NBA官網尋日爆料，指塞爾特人快將簽入呢位38歲老將，最快可能喺未來24小時簽約。據報塞爾特人將以老將超低薪135萬美元（約1,048萬港元）同奧尼爾簽約1年，同雷阿倫、皮雅斯、加納特組四巨頭。其實早幾日，奧尼爾接受訪問時已表明唔會轉戰海外，對加盟「綠軍」有興趣，喺NBA有一個「730日大計」，意味將打多NBA兩年直至40歲。

占士12月2日倒戈騎士

咁啱得咁蹺，NBA尋日正式公布新季部分焦點賽程，結果揭幕戰將由塞爾特人主場大戰熱火。同時，勒邦占士會喺美國時間12月2號作客倒戈騎士，到時肯定掀起騷動。至於熱火同湖人兩支新季爭標大熱，就被安排為聖誕節嘅重頭戲。