韋迪+奧尼爾+積遜威廉士=總冠軍。咁卡特+侯活+積遜威廉士又等於乜？魔術今季陣容上有大變動，艾殊頓走去籃網，陶告魯為老婆、為人工加盟速龍，換來過氣飛人卡特。雖然卡特同積遜威廉士唔會撞位，但恐怕大家想見到呢個組合一齊上場時間應該少之又少。
魔術第一控衞非尼爾遜莫屬，上季季後賽復出冇耐，雲根迪教練畀佢出場時間仲多過打得唔差嘅艾殊頓，就知尼爾遜始終係令雲根迪較放心一個。再者，穩定性強係尼爾遜最大優點，體力同路爾或積遜威廉士更加冇得比，所以積遜威廉士頂多可以爭後備。
不過，積遜威廉士喺魔術最大作用係佢啲季後賽經驗。尼爾遜有出色控球技巧，但只打過一年總決賽，積遜威廉士季後賽經驗豐富，而且喺熱火爭冠軍過程擔起重大角色，佢球風同魔術戰術相符，陣地戰同快攻都有一手，若果新球季佢成功以尼爾遜「教練」方式喺場內場外扶佢上位，令尼爾遜再成長，相信會係魔術呢個收購最大收穫。