人蛇開支年年增 庫房遲早被敗光

九龍城區議會尋日討論假難民問題，根據入境處最新資料，近年港府處理免遣返聲請嘅開支持續增加，本年度嘅修訂預算為七點四五億元，比原預算超支一億元，而下年度嘅開支更升至十一點三五億元添，可以講係高處未算高。

當然喇，假難民開支超出預算，一啲都唔出奇。香港好似無掩雞籠咁，唔止人蛇日日來，而且拖男帶女，開枝散葉，想唔超支都幾難咯。咪畀人講中吖，當局預計下年度假難民開支上升至逾十一億元，最後埋單計數，隨時又唔止呢個數㗎。

正所謂，坐食山崩。港府洗腳唔抹腳，基建工程超支早已淪為財政黑洞，家陣假難民超支又成為另一個無底深潭，咁搞法，就算有金山銀山都唔掂喇。難怪有人話，如果香港真係出現結構性財赤，唔係因為人口老化，亦唔係因為稅基狹窄，而係因為港府敗家，對假難民假仁假義。

歸根究柢，假難民之所以源源不絕，皆因港府中門大開，來者不拒。尤其係司法機構一味縱容假難民，更加助長偷渡歪風。呢，繼終審法院年前判決入境處須向一名在港犯案纍纍嘅南亞裔聲請漢「逐日賠償」合共一萬元後，區域法院日前亦判當局須向一名投訴扣留期間待遇不佳嘅南亞人蛇賠償二十一萬元，你話呢個究竟係乜嘢世界吖？偷渡唔使受罰，反而無端端發達，人蛇唔爭崩頭來港至奇喇。

善財難捨，冤枉甘心，港府對基層市民孤寒成性，連全民退保都唔肯承擔，但係對假難民就咁慷慨，咁多年來唔知浪費咗納稅人幾多血汗錢，你話係咪無良兼無能吖？咪話唔提醒吖，去年截獲嘅非法入境者增至三千八百多人，創六年來新高，再咁落去，多多儲備都唔夠港府敗家喇。

唔係講笑㗎，有立法會議員踢爆印度有人刊登廣告，列舉來港嘅種種好處，變相鼓勵當地人偷渡，如果港府再唔補鑊堵塞漏洞，香港遲早變難民港、罪惡城㗎。

都係嗰句喇，禍福無門，惟人自招，假難民問題尾大不掉，完全係港府咎由自取。難為北大人仲話香港發展要靠自己喎，港府無知無覺，無能無力，點樣靠自己吖？叮！