年宵寒風陣陣 檔主望天打卦

嗱，維園年宵係香港人過年嘅重頭戲，不嬲熱鬧非凡，但今年唔同往年，天氣咁凍，經濟咁差，人流大減，唔少檔主都大嘆生意難做。有中學生連續四年喺維園開檔，見證年宵興衰，佢哋都話首日人流比去年勁減一半，今年唔使蝕已經偷笑，唔敢期望有錢賺喎。

賣年花嘅攤檔亦唔好得幾多，天氣忽冷忽熱，水仙到依家都未開花，為免影響銷情，就算檔租比去年增加一萬多元，都唔敢貿然加價，希望薄利多銷咁話，你話係咪愁吖？

話時話，市民勒住荷包，受影響嘅又點止年宵市場吖，連利是封印刷公司同埋出售賀年揮春嘅舖頭，生意都勁跌三至四成。如果話好嘅開始係成功嘅一半，咁猴年未到已經開壞個頭，今年香港想有運行都幾難咯。

過年氣氛咁差，其實一啲都唔令人奇怪，睇埋新鮮出爐嘅零售數據就知嘞。去年十二月零售業總銷貨價值跌勢不止，唔止比前年同期勁跌百分之八點五，亦比十一月嘅百分之七點八跌幅擴大，而去年全年嘅總銷貨價值亦比前年下跌百分之三點七，問你怕未。

條數跌到阿媽都唔認得，梗係有原因喇，正如政府發言人話齋，旅遊業持續放緩，經濟前景不明，仲邊有人捨得大手筆消費吖。加上預測新春期間內地訪港團暴減三至五成，零售業慘上加慘。其實衰退嘅點止零售、旅遊業吖，有「大笨象」之稱嘅滙控率先公布凍薪同埋凍結招聘人手嘅「雙凍」措施。春江水寒鴨先知，連「百業之母」嘅銀行都咁悲觀，其他中小企肯定更難捱，有人預計春節後出現大規模裁員結業潮，恐怕好嘅唔靈醜嘅靈咯。

本來呢，香港人最擅長打逆境波，獅子山精神都係咁樣培養出嚟嘅啫。可惜吖，家陣香港一味沉迷政治爭拗，連對經濟有益嘅高鐵都隨時爛尾收場，搞到外國商會都擔心基建受阻影響營商環境，萬一外商都撤資，香港實玩完都似。

冇計嘞，家陣成個大環境都寒氣逼人，加上社會高度政治化，經濟雪上加霜，打工仔只能自求多福，今個新年都係慳啲使喇。叮！