今年施政報告話要將香港發展為智慧城市，仲話要喺三年內將本港Wi-Fi覆蓋率倍增，但重質唔重量係唔得嘅。立法會議員鍾樹根尋日喺資訊科技及廣播事務委員會會議上話，佢搭巴士由北角到金鐘開會，竟然成程車都搜尋唔到Wi-Fi信號，而且途經都唔係偏僻地方，質問「政府做緊乜？」仲話深圳求其一個巴士站都可以搵到Wi-Fi上網，香港連內地都不如。

依家人人手機都可以上網，點解樹根咁緊張條街有冇Wi-Fi呢？樹根就話，因為依家網絡供應商提供嘅數據有限，如果街上有Wi-Fi，市民就算戶外上網睇電視、電影都唔會「用爆」數據喎，咁講即係要政府補貼畀市民上網睇戲啦。議員梁國雄都大彈政府場地Wi-Fi信號差，立法會幾乎收唔到，政府總部亦然，搞到示威者想網上發放示威實況都唔得喎。

另外，進出口界議員黃定光（象哥）就喺同一個會議上話，政府話要推動電影院發展，佢當年仲係o靚仔時拍拖睇場戲、食餐飯都唔係使好多錢，但依家閒閒哋都要使三百多元。三百多元對象哥嚟講，應該唔係大數目，佢唔會因為咁而唔同太太拍拖睇戲啩？

第一手消息請下載on.cc東網iPhone/iPad/Android/Windows Phone Apps