子曰，「食不厭精，膾不厭細」，家陣應該改為「食不厭毒，膾不厭假」至啱。神州大地黑心食品氾濫成災，造假製毒嘅手法博大精深，令人防不勝防，食你唔死算好彩嘅咋。

今時今日，內地到咗無物不毒、無食能安嘅地步，淨係多年前嘅「頭髮豉油」咋，令人猶有餘悸。正所謂，沒有最恐怖，只有更恐怖，內地造假製劣不斷推陳出新，「頭髮豉油」早就out嘞，家陣輪到化學豉油同埋化學蠔油上場。

嗱，本報記者直擊廣州食品批發市場，發現調製化學豉油及蠔油嘅化學原料隨處有售，幾十元有交易。其中一種添加物鹽酸水解植物蛋白，含化學品氯丙二醇，實驗證明可損害老鼠腎臟、中樞神經及生殖系統，甚至演變為癌症，人類食咗，唔死一身潺都似。最可怕嘅係，呢啲化學毒物無論色香味都幾可亂真，連專家都未必可以分辨，你話普通市民係咪隨時中招吖？

咁都唔止，黑心商人仲會用工業原料充當食材，除咗常見嘅工業鹽醃製豬肉及鹹蛋，更以工業冰醋酸製造白醋，以工業酒精溝水當白酒賣，直頭好似魔術師咁，要乜變乜。淨係廣州一個批發市場咋，乜嘢工業原料都有齊，任君選擇。由於成本低，製作時間短，好多不法食肆及廠商都有採用。難怪內地有句笑話：唔將化學元素周期表嘗遍，唔配做中國人，真係笑中有淚o架。

即係咁，工業原料話明係工業用途，根本唔擺得入口，好似今年廣州就有一家六口懷疑食用工業鹽，搞到上吐下瀉，抽出嚟嘅血仲係黑色嘅添。仲有呀，廣州曾有不法商人以工業用酒精釀製白酒，導致十四人甲醇中毒死亡，多人失明，諗起都心寒。正如專家話齋，長期進食含有重金屬等不明化學原料食物，會影響肝腎及骨髓功能，甚至有致癌危機。所以話，中國人成為新一代東亞病夫又有乜出奇。

冇計嘞，殺頭嘅生意有人做，黑心商人財迷心竅，幾陰騭嘅事都做得出。咪以為香港可以獨善其身呀，家陣大多數食物都依靠內地供應，香港早就唔係淨土嘞。好似蘇丹紅禽蛋、孔雀石綠魚、坑渠油、毒奶粉、過期肉輪番攻陷本港，咪就係最佳例子囉。

一句到尾，港產官僚大事已經做唔成，如果連食安把關都一舊雲，仲有乜顏面面對市民喎，不如自己飲化學豉油以謝天下喇，叮！