政壇：陳健波頭髮烏黑靠老婆
立法會保險界議員陳健波接任財務委員會主席呢個燙手山芋後，知名度大增，行街都多咗市民認得佢，同時議會工作愈嚟愈忙，但佢似乎都未見老態，六十一歲依然頭髮烏黑喎。陳健波笑言，太太以前學過師幫長者剪頭髮，佢個頭亦由太太親自操刀，剪咗二十幾年，近年仲用咗天然草本染髮劑幫佢染髮，佢啲頭髮有咗太太呢位「幕後黑手」，想喺屋企立即變黑晒亦得，得咗！
陳健波長年保持黑髮，原來係太太多年嚟嘅功勞。（資料圖片）
着重養生嘅陳健波又推介用杞子煲熱水明目，早前佢已經被我哋撞到佢買咗八大袋靚杞子返立法會，送畀建制派議員。佢自言三十歲時，已經有九百幾度近視，但飲咗多年杞子水，近年做眼部檢查結果都好滿意。不過，其實點養生都係無謂，事關泛民主派議員再係無止境咁點人數「拉布」，佢就建議立法會秘書處將點人數嘅「催魂鐘」改為義勇軍進行曲，睇吓泛民仲敢唔敢點人數喎。
