雖然過咗Boxing Day，節日氣氛仍濃，港交所繼續收上市紀念品，仲要係老少咸宜！有雕塑、有刺繡，仲有玩具模型貨車，款款都可能啱你心水。

東陽光藥送咗名叫「乳源彩石」嘅稀有石頭畀港交所，寓意秋天係收穫嘅季節。

承達就送咗木雕碟。

以罕有度嚟計，東陽光藥都算大手筆，送咗一舊叫「乳源彩石」嘅稀有石頭畀港交所。唔止稀有，仲有寓意，寓意秋天係收穫嘅季節咁話。肯定恨死啲石頭發燒友。

中國宇天就送咗個洪澤湖雕塑，事關佢哋公司喺江蘇洪澤縣起家。湖嘅造型點可以做雕塑呢？嗱，為等大家一定睇得到嗰個係洪澤湖，所以喺湖上面準備咗一條大船。咁，仲唔明晒！

承達同埋飛尚非金屬就有啲詩意，分別送木雕碟同埋刺繡；而環宇物流就同其他物流公司差唔多，送架貨車模型畀港交所，相信大人細路都鍾意！你又like邊款呢？

第一手消息請下載on.cc東網iPhone/iPad/Android/Windows Phone Apps