政壇：搞搞政：圖破新東宿命 愛蘭再「嫁」有期

龐愛蘭加入公民力量前係新世紀論壇成員，換言之今次可能係第二次轉會參選。佢繼○八年立會選舉以新世紀論壇名義出選新東直選以二萬多票落敗；一二年加入公民力量再戰新東直選，以接近二萬四千票飲恨落敗。由於新世紀論壇同公民力量均屬於傳統建制陣營，若佢真係加入被指為「壞孩子」嘅富貴黨，選票可能隨時流失。

富貴黨拉攏可試票

其實政界有傳富貴黨田北俊喺明年立會選舉，會由新東轉戰香港島，但一直未搵到合適人選接棒新東議席，加上該黨老將沙田區議員梁志偉亦喺今次區選敗陣，即使派人參選亦無足夠地區樁腳支持。雖然新東補選議席只有幾個月任期，其他建制派唔會熱衷派人參選，但若然富貴黨成功拉攏龐愛蘭，該黨就可藉今次補選試票。

大家要留意，龐愛蘭喺○八年新東選戰曾被指「界」走田北俊嘅票源，導致田少落敗，如今雙方可能由仇家變成戰友，莫非雙方各自已去到無路可走嘅地步？

龐愛蘭接受查詢時坦言，半年前有富貴黨高層曾搵佢了解入黨意向，但至今仍在洽談中，未決定加入。至於考慮加入嘅因素，佢話現階段唔方便透露，但承認新界東補選係其中一個原因，兩者之間有啲關係。雖然富貴黨冇正面回應係咪同龐愛蘭洽談，但就透露佢曾出席該黨嘅區選慰勞宴。究竟龐愛蘭會唔會再「嫁」，相信很快就有答案。