政壇：乳鴿爭位 惡鬥連場

尋日就有「峯鴿」陣營中人反擊，仲踢爆該黨嘅內部民調顯示，峯鴿出戰「超級區議會」嘅支持度比羅健熙更高，暗示如果羅健熙力撐柴文瀚出選港島，就應該讓出「超選」參選名額畀峯鴿，以「圍魏救趙」手法拆散「羅文配」！

白鴿黨主流派向來支持由羅健熙夥拍本身係立法會超級議員嘅「老鴿」涂謹申出戰「超選」，柴文瀚出選港島，認為後者相對其他「乳鴿」較為穩重成熟。惟柴文瀚個人知名度一直偏低，唔夠多次發動佔領區議會並因而被檢控嘅峯鴿出位。

消息指出，原來白鴿黨曾喺區選前秘密進行民調，讓選民就各黨派嘅潛在立法會參選人表態。其中喺港島區，以現任立法會議員單仲偕支持度最高，其他幾隻「乳鴿」相距不大。反而喺「超選」方面，扣除涂謹申之後，居然以在黨內未有正式報名角逐「超選」嘅峯鴿支持度最高，拋離羅健熙幾個身位。

明年支持度或執位

須知白鴿黨嘅立法會選舉甄選制度採取「八一一」機制，即地區民調結果佔八成，支部區議員同地區黨員意願僅各佔一成，所以前者對邊隻「乳鴿」最終可以出線極為重要。不過，據悉白鴿黨會喺明年初進行第二輪民調，到時各人嘅支持度可能又會大執位，總之呢場「乳鴿」爭位戰仲有排打落去。