樓價高企,搞到香港好多年輕世代買唔起樓,有啲人遲遲都未結婚,即使結咗婚都唔敢生兒育女,今年二月拉埋天窗嘅勞工界立法會議員郭偉強都呻埋一份,事關佢太太已懷孕三個多月,佢雖然就嚟榮升老竇,但都煩住屋問題,只好望美國快啲加息同政府加大力度覓地建屋,推冧個市,等佢可以快啲置業嘞。

擔心加息難負擔

夢想樓市冰封,等佢可以飛撲搶樓嘅郭偉強家吓仲同父母同住,佢話早喺拍緊拖嘅時候已經好希望買樓,但等到依家都未成事,依家只好希望喺BB出世前置業,就算係一房單位都好。其實,佢最近已經開始睇樓,但發現所有啱心水同大細嘅樓盤,閒閒哋都要四、五百萬元,擔心將來一加息自己就負擔唔起。

佢咁驚青,原因之一可能係現屆立法會只餘下一年任期,工聯會內部規定勞工界議員只能做一屆,之後就要讓位轉戰直選,但立法會各區直選議席向來都僧多粥少、競爭激烈,郭偉強想角逐連任,可謂困難重重,一旦落選就會收入大減,自然要小心計掂條數,所以壓力唔細呀!

太太喺呢個時候懷孕,會唔會令佢分心呢?郭偉強就強調呢件係喺佢哋計劃之內,並非意外,因為太太希望小朋友屬猴,認為將來會活潑啲。佢暫時未知BB係仔定女,但就覺得係仔係女都冇咩所謂嘞。

第一手消息請下載on.cc東網iPhone/iPad/Android/Windows Phone Apps