城中鏡：李垂誼 妙韻伴古蹟
話說著名大提琴演奏家Trey李垂誼年少時體驗過考古工作，故對古舊事物特別有感情，佢會策劃十一月下旬為期五日嘅第三屆「樂．誼國際音樂節」，其中一日會走出演奏廳，安排幾位音樂大師到已列為古蹟嘅尖沙咀舊水警總部獻藝。阿Trey話香港嘅舊建築好多都係無價寶，可惜港人生活匆忙未能細賞，故佢希望音樂會除讓觀眾享受悠揚妙韻，同時體會舊建築之美。
李垂誼（右）同李嘉齡都好欣賞香港嘅老舊建築。
阿Trey認為老舊事物唔一定等如落伍，若然貪新忘舊，就會失去本身嘅文化特色，對遊客再無吸引力，所以佢力撐歷史悠久嘅電車同天星小輪。
都有參與古蹟演奏嘅鋼琴家李嘉齡就話，歐洲人視老舊建築係歷史文化遺產，因此保存工作非常出色，往往可以做到一個城市之內嘅建築物新舊交集而不失和諧，值得香港借鏡。
