城中鏡：曹星如破惘

香港女律師協會同協青社早前舉辦「泰拳慈善夜」，曹星如罕有咁同爸爸曹樹仁一齊現身觀賞慈善賽，替參與嘅年輕人打氣。曹星如坦言，當年讀完中五後好迷惘，唔知做邊行好，於是就渾渾噩噩咁做咗一段時間散工，後來都係遇到佢依家嘅經理人，先至開展目前嘅西洋拳拳擊職業生涯。

到場支持嘅仲有香港醫學會副會長周伯展同律師何君堯等。講起拳擊運動嘅安全問題，周伯展話部分國家嘅醫生認為呢種運動風險較高，但近日香港醫生就首次討論起呢個話題，佢個人認為最緊要做足安全措施，風險就大大降低。佢作為眼科醫生，指因運動傷眼嘅病人中，最多係打籃球、羽毛球同壁球，所以佢打壁球時都會戴護眼罩。

黃琦雅跳舞拓社交

香港女律師協會前會長Anne陳慧蕊兩年前開始打泰拳，仲因此瘦咗近二十磅，外表年輕晒，笑言兩個仔依家都好鍾意黐住佢出街。副會長Angela黃琦雅就鍾情跳舞，話運動可以擴闊生活圈子。何君堯笑指人生最迷惘就係學生時代追女仔，而青春期做運動唔止可以減壓同發洩，仲順便收身同有助發育。