政壇：心急陪太太產檢 郭榮鏗亂過馬路
立法會法律界議員郭榮鏗身為大律師竟然亂過馬路？尋日下午喺中環見到郭榮鏗喺置地廣場對出，神色匆匆咁越過皇后大道中走向都爹利街方向，惟馬路兩旁都係鐵欄，顯然唔係行人過路線，而佢橫過馬路期間車來攘往，險象環生。究竟佢為乜咁匆忙亂過馬路？原來係為咗陪太太產前檢查。
郭榮鏗於車來攘往的中環皇后大道中亂過馬路。
郭榮鏗接受查詢時話，因為尋日早上喺中環參加講座，原定講座後陪臨盆在即嘅太太去產前檢查，但奈何講座超時，令佢要匆忙趕往診所陪太太見醫生。佢又透露，小生命嘅預產期正係今個星期，尋日係最後一次產前檢查，換言之佢喺呢幾日隨時再做爸爸。
已有一名六歲兒子嘅郭榮鏗，一向都讓小朋友保持低調，被問到即將出世嘅新家庭成員係男或女時，佢仍然保持神秘。不過，佢透露已為新成員諗定名字，亦已買齊嬰兒用品，一有好消息就會話畀大家知喎。
