政壇：卿姐連環炮 鬧新壇主「傻仔」嗌佳叔「去瞓啦」
開咗學成個禮拜，港台節目《城市論壇》尋日亦放完暑假，重新「開壇」，立即擦出火花。不過，今次並唔係嘉賓講者互鬧，而係其中一位嘉賓白鴿黨主席劉慧卿（卿姐）唔小心講錯嘢，畀論壇嘅新主持蘇敬恆糾正時，卿姐反斥對方「傻仔」！卿姐唔止對呢位新主持好好火，喺論壇上仲大鬧全國港澳研究會副會長劉兆佳嘅「忠誠反對派」言論，着對方「去瞓啦」，又炮轟另一嘉賓講者周浩鼎所屬嘅建仔，冇向中央反映港人嘅真正聲音，嚇到周浩鼎手都震埋。
自稱口頭禪 事後已道歉
話說尋日嘅討論議題係白鴿黨密會京官事件，卿姐講到中央同香港嘅憲制地位時，突然爆咗一句「香港係中華民國嘅一部分！」蘇敬恆已經冇即時指正佢，等到卿姐差唔多講完，佢先提醒對方係咪其實想講「中華人民共和國」。卿姐衝口而出咁話蘇敬恆係「傻仔」，強調「我梗係識分」！
鬧完蘇敬恆，就到周浩鼎。問到建仔點睇白鴿黨見國務院港澳辦副主任馮巍一事，周浩鼎就話白鴿黨同中央官員會面係值得鼓勵，然後又話一直都有叫中央同其他黨派見面，仲講到話同中央講過香港有好多人反佔中。卿姐聽到呢句就火喇，即鬧周浩鼎所屬嘅政黨建仔有冇同中央講香港依家社會撕裂嘅狀況，同埋年輕人嘅意見，嚇到周浩鼎手都震埋。
最後講到劉兆佳早前提及過白鴿黨或者可以成為「忠誠的反對派」，卿姐又再一次發炮叫劉兆佳「去瞓啦！」佢強調白鴿黨唔會成為中央政治花瓶，又指香港依家係冇執政黨輪替，所以劉兆佳講嘅事係唔會發生嘅。
對於鬧蘇敬恆係「傻仔」一事，卿姐其後知道自己講錯嘢，已即場透過社交網站向蘇敬恆致歉，仲讚對方係好主持、好專業。佢自言用「傻仔」嚟形容別人係佢嘅口頭禪，平日都會用嚟稱呼自己啲黨友，強調當時佢並無惡意，以後真係要改吓。
