烏煙瘴氣罩香江 點止劏房空氣差
喺笑片入面，有種超級武器叫「攞你命三千」，集單車鏈同西瓜刀等劈友架生於一身，每件都係獨當一面嘅殺人兇器。其實喺現實世界，一樣有民生版「攞你命三千」，就係劏房加上空氣污染嘞。
有關注團體為劏房空氣質素進行調查，喺今年六月至八月抽樣量度深水埗及旺角等七區共四十四間劏房空氣污染物PM2.5濃度，發現兩成單位超標，平均超標逾一倍，其中葵青更加係重災區，每立方米錄得一百二十四微克污染物。關注團體促請政府為劏房戶解困，短期可以考慮提供夏季能源補貼，長遠必須解決房屋問題，包括興建中轉屋及增建更多公屋，令劏房逐漸被淘汰。
係人都知，劏房多數隱藏喺市區舊樓入面，好多都無窗戶同抽風設備，加上空間狹窄，人口稠密，空氣污染唔嚴重至奇。根據研究，空氣每增加十微克污染物，自然死亡風險就會增加一成四，心臟病死亡機會更加增加四成二，話住劏房會短命啲，有根據o架。一直以嚟，劏房消防危機四伏，事故不斷，已經夠晒恐怖喇，點不知空氣污染更加殺人於無形，問你怕未。
點解劏房咁危險都有人住？咪因為房屋困局死結難解囉。由於居住環境太惡劣，擠迫到好似沙甸魚咁，好多年輕夫婦莫講唔敢生兒育女，連一齊生活都變成奢望，有八十後攝影師因女兒出世而被迫同太太「分居」，亦有年輕孕婦要靠搶購「白居二」至可以同丈夫「團圓」，房屋問題搞到多少人「妻離子散」，幾咁悲哀。關注團體要求當局解決房屋問題，望梗係咁望喇，問題係，以港產官僚嘅低能表現，呢個願望恐怕比人類上火星更加渺茫啫！
講開又講，香港空氣質素惡劣早已臭名遠揚，受害嘅又點止劏房住戶吖。呢，天文台前台長林超英早前喺網誌踢爆，上月初本港路邊廢氣混濁到令人無法呼吸，佢想提醒住喺東區嘅母親，點知遲咗一步，母親因為晨運而令呼吸道舊患發作，搞到咳血咁滯，需要入院治理，你話係咪得人驚吖。空氣污染避無可避，市民唔想「吸毒」，咪千方百計移居他鄉囉。
所以話，香港人真係命苦，安居樂業固然係遙不可及嘅夢想，連呼吸一啖新鮮空氣、飲一啖乾淨食水都變成奢望。事實證明，無能官僚就係天下間最攞命嘅兇器，叮！
