城中鏡：退休要鋪路
呢排好多名人喺書展為自己嘅新書搞分享會，尋日喺書展就見到旅遊達人James項明生，講到近日有郵輪因颱風更改航線，由原本目的地為日本改航往泰國等地，佢話消費者難得有假期梗係唔想浪費掃興，所以事前一定要做足功課搜集資料。
項明生話夏季唔係坐郵輪遊亞洲的時機。
金民豪最欣賞巴斯光年係一個勇敢嘅領袖。
靳埭強（左）同紀治興（右）分享閱讀心得。
James話依家係鄰近地區打風季節，就算出發當日冇事，一個郵輪航程七至八日，梗有一日撞中打風，所以依家的確唔適合坐郵輪去日本，市民亦無謂用寶貴嘅假期去冒咁大風險，加上船公司有權因應天氣或安全問題更改航道，唔想假期被打亂，就要揀啱嘅時間，坐啱嘅船去啱嘅地方。而為咗提早退休享受人生，James足足計劃咗近十年，累積儲蓄約八位數字，加上有一物業在手，先放心退休四圍玩。
儲夠400萬元可安心
但唔係個個退休都想四周圍去，四十九歲就退休嘅「退休達人」、惠普環球前副總裁紀治興話，退休前一定要諗好想做啲乜，有完整規劃，好多人單純話想環遊世界，其實可能百幾日就去完，之後唔知做乜好，而佢個人興趣唔係周遊列國，而係投身搞社企，享受箇中樂趣。佢仲畀貼士年輕人，其實儲夠四百萬元，每年投資回報有百分之五，即二十萬元，每月約一萬七千元已夠一家三口生活開支，有條件可以退休。
一眾名人出席書展活動大講睇書心得，迪士尼樂園度假區行政總裁金民豪首次公開講古仔，話最欣賞卡通人物巴斯光年係一個勇敢的領袖，而著名設計師靳埭強則鍾意睇新派武俠小說，笑言有時一追就追足三日。
