元朗屏信街：垃圾堆滿街 食署懶巡查
垃圾堆積影響衞生，市民不滿食環署執法不力！元朗居民阮小姐早前發現屏信街有多袋雜物堆放，部分垃圾更未有妥善處理，令垃圾散落地上，「啲垃圾一袋袋咁堆晒喺度，有啲仲未綁好，搞到一地都係，隔籬就係幼稚園，容乜易搞到啲小朋友病晒！」阮要求食環署盡快清理。
元朗屏信街後巷被發現有多袋垃圾堆放，部分垃圾袋未有綁好致垃圾外露。
廚餘腐爛孳生蚊鼠
食物環境事務署發言人表示，接獲轉介後隨即派員巡查，發現有垃圾堆放，已安排街道潔淨服務承辦商清理及清洗附近一帶公眾地方。該署亦已提醒上址一帶食肆負責人妥善處理垃圾及廚餘，確保環境衞生。該署其後派員再作巡查，期間再無發現投訴所指情況或有人非法棄置垃圾。
「有食肆嘅地方食環就應該定期巡查啦，點會投訴完先巡！」阮小姐指廚餘容易腐爛，亦會孳生蚊蟲及鼠患，要求該食環署加強巡查及檢控違規人士。
