城中鏡：何君堯 周永健合唱甩Beat
話說香港律師會前會長Junius何君堯尋日舉行新書發布會，而會上另一亮點就係佢同香港賽馬會副主席Anthony周永健合唱。其實發布會本身已經有人表演唱歌，但台下嘉賓似乎好想聽到佢哋大展歌喉，於是二人就合唱咗一首經典英文歌《Let it be》。可能事前冇夾過啦，唱唱吓有啲甩Beat，但嘉賓一樣聽到好陶醉，仲大叫「encore」添！
何君堯（左）同周永健（右）唱歌冧長者唱到甩晒Beat。
原來尋日係Anthony生日，咁啱Junius又係六月壽星仔，所以大會準備咗蛋糕，同兩位壽星仔同六月生日嘅長者嘉賓一齊慶祝。Junius亦好識做，準備咗利是派畀一眾壽星仔女，氹到個個都好開心。
之前有傳富貴黨向Junius招手，但佢一直未有回應呢個講法。佢尋日終於親自解畫，表明唔會加入任何政黨，強調冇政黨取向，認為香港最重要係「real team work」，即係團結一致咁話。佢承認富貴黨對佢唔錯，但就話支持該黨唔一定要加入，如果佢要入政黨，一早就入咗，唔會等到依家喎。
