官衙變雪房 節能大隻講

呢，港府聲稱要將香港打造成環保城市，環保署上月仲公布咗首份都市節能藍圖，制訂多項節能新目標，似模似樣，係威係勢，點知新目標只係用來規範市民，港產官僚完全當呢份藍圖冇到，結果唔少部門淪為「嘥電鬼」，簡直係做壞規矩。

即係咁，環保署一直建議將室內冷氣溫度調校至攝氏二十五點五度，話呢個溫度最舒適，而且可以慳電，鼓勵市民同機構跟進喎。可惜吖，你有你建議，佢有佢嘥電，本報記者親身檢測發現，政府部門開大冷氣浪費電力情況相當普遍，包括郵局、圖書館同運動場等多處場所，冷氣有咁勁開到咁勁，溫度遠低於環保署建議嘅標準。

例如中環郵政總局咁吖，一入門口就感到一股寒氣，直情好似入咗雪房咁，室溫只有不足二十三度。咁就奇嘞，香港郵政長期虧蝕，搞到財政緊絀，照計應該盡量慳電至係，點解反而好似洗腳唔抹腳咁隨便浪費電力呢？答案好簡單，反正電費係阿公畀，郵政官僚根本唔知節能為何物！

除咗郵局，體育館及公共圖書館同樣寒氣逼人。其中灣仔駱克道體育館最離譜，室溫只有二十度多啲；大埔嘅體育館亦差唔多，遠遠低過標準。至於公共圖書館咯喎，室溫話就話普遍高過體育館，但一樣唔符合標準，灣仔駱克道自修室就係因為室溫太低，唔少學生要着外套至可以安心溫書，問你服未！

咪以為室溫低三幾度係小兒科吖，除咗虛耗電力，更加係環保嘅大忌。正如專家話齋，冷氣係主要耗電設備，佔建築物耗電量六成，冷氣每調低一度，就會增加一成耗電量。以一部普通嘅冷氣機計算，每日開十個鐘，電費六元，而每調低一度電費就增加六毫，小數怕長計，政府部門長年累月調低冷氣，你話究竟浪費幾多公帑吖。

難為香港郵政仲死撐，話已經按政府指引設定冷氣溫度，只因各郵局面積、設計及人流唔同，至會出現差異喎。其實係人都知，冷氣溫度好易調校啫，郵局室溫長期低於標準，只有一種可能，就係郵政官僚根本唔當指引一回事，更加唔當公帑一回事，叮！