政壇：搞搞政：創科局靠邊站Greg蘇即鬆人
立法會財務委員會日前審議蓮塘/香園圍口岸工程撥款議案時，原本嘅拉布場面冇出現，撥款竟然意外地通過咗，嚟緊係咪到創新及科技局（創科局）﹖消息話唔係，由於建制派唔支持，政府都死咗條心，又係噃，負責嘅商務及經濟發展局局長蘇錦樑（Greg蘇）都懶理，走咗去德、法兩國外訪，丟低副局長梁敬國喺上周三獨自處理創科局決議案就係例子啦。
（設計圖片及對白）
據講，因為政府已打聽過如再打尖提交創新及科技局（創科局）撥款申請，建制派都唔會力撐，與其由得一直反對成立創科局嘅人民力量（人力）議員「拉布」，不如先處理積壓已久嘅撥款申請，正因為咁，人力先肯讓路通過蓮塘/香園圍口岸工程撥款申請，前日嘅財委會會議上，人力議員唔止鮮有發言，仲連中止待續議案都冇提出，最後只係提出十七項修訂就收工，令撥款申請順利通過。
勢遭拉布不如讓路
有泛民中人透露，原來大舊已經向財委會主席張宇人「摸底」，得悉政府唔會再抽起財委會原本議程、打尖提交創科局撥款申請，所以先肯讓路。不過，財委會周五會審議多項工務工程撥款申請，政府亦疑似為政改方案讓路，取消原定本月十九日舉行嘅財委會。依家距離暑假休會，財委會只剩三日合共四節會議，如果政府本月二十六日再提交創科局撥款申請，創科局分分鐘同樣再被「拉布」拉倒，早啲順勢調整冇咁肉酸。
