政壇：慢必EQ孭仔扯大纜
年底嘅區議會選舉係政圈大事，建制派同泛民陣營喺好多選區都布好陣，有啲區就拉鋸緊。我哋早前都同大家講過，雙方競爭激烈，有時仲係同一陣營互鬥添。沙田禾輋邨嘅議席之爭，就好可能成為立法會議員鬥演幕後推功嘅舞台，事關最近聽聞人力準備派出立法會議員陳志全（慢必）嘅助理李煒鋒出戰，但現任區議員係民建聯（建仔）嘅余倩雯，佢哋背後各有黨內嘅新東直選議員撐腰，今次真係鬥扯大纜囉。
（設計圖片及對白）
講開呢區嘅形勢，我哋去年報道過經民聯亦派出社區幹事李德華頻頻落區試水溫，早已挑起建仔嘅敏感神經，亦有人擔心建制協調不佳，互砌益咗人哋，結果，冇耐就傳出人力派員踩多腳，希望收鷸蚌相爭、漁人得利之效。人力有此舉動，其實都唔係即興，皆因慢必早年喺同區嘅瀝源邨開設辦事處，深耕下儲落唔少支持者，期望自己做引擎，帶挈黨內新丁唔出奇。
小試牛刀一利兩便
據建制派內部協調機制指示，假如有泛民政黨加入戰團，建制政黨就兩個只能活一個，所以建制陣營都盡量避免同陣營互相鎅票。
講番慢必派助理小試牛刀，既儲到經驗，又可以打對手，一利兩便，加上近年區選愈趨政治化，泛民落戶建制陣營，即使搶唔到一席位，都有左右結果嘅力量。睇怕該區立法會議員葛珮帆同陳克勤都要畀啲力，余倩雯先有望成功連任。
