政壇：前輩評港股未到大時代

「以前嘅大時代可以用『魚翅撈飯，雞犬皆升』嚟形容，依家都唔見個個人都有錢賺，七、八十年代炒股容易得多」，六福金融主席許照中仲話內地資金湧嚟造就大市每日成交破千億，只係港股新常態，但恒指連28,000點都企唔穩。

幾時先算真正「大時代」？證券界老行尊眾利股票主席董偉話「等深港通開車，就話唔埋可能出現」，佢仲話「恒指最高都係見28,500點就腳軟，好多股份都未升過」，佢又話香港未去到瘋炒階段，不過，「如果見到啲人開始魚翅撈飯，就代表個市見頂，要小心。」前輩，收到。見個市反反覆覆，心郁郁想炒多轉？元朗股神曾錦安話「以前見到罕有嘅古董錶，會忍唔住手買，依家留番啲錢炒股好過，之後賺番再買未遲」，佢仲話有個老友原本無炒開股，上星期都用咗幾十萬入市，望賺一倍換架靚車。