政壇：水署遷天水圍 大舊罕有力撐
由泛民主派操控嘅立法會工務小組委員會，近期火速審議政府撥款申請，繼上星期順利通過六項撥款申請，尋日又通過多三項撥款，包括香港藝術館擴建、水務署新界西辦事處由旺角遷至天水圍、沙田區道路及渠務工程等。唔單止咁，成日同政府唱反調嘅人民力量「大舊」陳偉業，仲罕有表態支持政府搬遷水務署，話有助天水圍擺脫悲情城市嘅形象喎。咁支持，莫非同呢個係佢所屬選區有關？
水署原址用途未決
政府向工務小組申請八億二千多萬元撥款，將旺角洗衣街水務署新界西辦事處及水資源教育中心，遷至天水圍天祥路同天柏路交界嘅一幅土地，並興建一座新大樓。雖然建制派議員葉國謙支持上述項目，但認為天水圍位置偏遠，交通同旺角有啲差距，呢句說話隨即惹起大舊不滿。大舊話一向鼓勵政府將辦事處搬到天水圍，希望藉此改變天水圍悲情城市嘅觀念，批評葉國謙嘅講法正正反映主流權貴對該區嘅形象，為此佢要加以糾正同譴責。
大舊又話水務署由旺角搬到天水圍，佢係「熱烈歡迎，熱烈鼓掌」，因為天水圍加埋屯門、元朗，人口已經超過一百萬人。交通方面，由荃灣經大欖隧道入去只需十五分鐘，所以交通方便。相反，當年青年廣場選址柴灣，屬於港島最邊緣嘅地方，天水圍居民入去最少都要一個小時以上，批評葉國謙嘅講法好明顯係唔熟識香港嘅地理環境。
另外，社民連「長毛」梁國雄就不滿政府仲未決定水務署原址嘅用途，因為立法會文件顯示，當局仍考慮緊將原址重建為住宅、酒店、休憩用地、社區設施等用途，批評當局「連塊地點用都未知」，「點對得住旺角嘅街坊」，又叫九龍西議員「一舊雲」黃碧雲講吓居民嘅慘況。
不過，一舊雲就比較關注水資源教育中心嘅入場人次同對象、網頁內容係咪更新、飲用水等通識科問題，搞到長毛最後要自己兜番，話水係希臘哲學嘅來源。真係九唔搭八！
