高永聯事隔十二年再度參選區議會，挑戰雙料議員范國威。
區議會選舉年底舉行，唔少身兼區議會及立法會嘅泛民主派雙料議員都成為建制派嘅狙擊對象，其中工聯會（工記）社區幹事高永聯就準備挑戰新民主同盟范國威（Gary）嘅西貢運亨選區議席。高永聯話，選區議員最緊要做好地區工作，唔係學歷高、靚仔就得，從事地區工作超過三十年嘅佢信心十足。
本身係揸的士嘅高永聯，從政經驗都唔少，曾經係民協成員，雖然三次挑戰區選落敗，但依然屢敗屢戰，事隔十二年再度考慮參選。佢話依家主要以打游擊方式做宣傳，每朝會抽兩個鐘上街嗌咪，下晝收工後再擺流動街站。而佢每次擺街站都會出動「三寶」，分別係橙背心、大頭旗幡同腰包咪，希望街坊容易認到佢 。
講開對手Gary，高永聯話聽聞唔少街坊開始對佢反感，事關Gary百足咁多爪，根本冇時間做地區工作。最諷刺嘅係，Gary平時打住「民生無小事」旗號，但小小事都幫唔到居民，支持拖篋行動更加係陷害民生同經濟。Gary就回應話，大家即管比併吓地區工作，顯示下真功夫，歡迎競爭。
第一手消息請下載on.cc東網
