內地手機品牌小米崛起得好快，創始人雷軍二○一○年先創辦企業，二○一一年推出第一代小米手機，發展至舊年已經打低三星同Apple，成為內地智能手機一哥，仲係全球五大手機生產商之一。個勢咁好，但雷軍都有遺憾。
佢前日喺北京開記招，大呻小米被山寨貨拖累業績，仲話舊年小米移動電源賣出一千四百六十萬個，無假貨嘅話，估計銷量至少可以多一倍甚至兩倍，仲強調，假貨係小米最大嘅困擾。呢番話令人不期然想起小米一直被人指係靠Apple模式起家，小米被冠咗個「中國Apple」嘅名，連雷軍亦被內地傳媒稱為「雷布斯」。
而原裝Apple更加唔多Like呢個中國版，Apple高級副總裁Jonathan Ive舊年接受雜誌訪問，一提到「中國Apple」，Ive即刻話「我唔覺得係讚囉」，仲話「當你用咗七、八年去整樣嘢，跟手就畀人抄咗。好明顯，嗰啲係偷嘢同埋懶，我覺得完全唔OK喎」，態度又狠又直接。
第一手消息請下載on.cc東網
