泛民二十多名議員企硬要反對人大「八三一」框架下嘅政改方案，但溫和嘅民主黨（白鴿黨）前立法會議員黃成智支持「袋住先」，公民黨亦有議員正籌組溫和派論政平台撐「袋住先」，眼見溫和派氣勢高漲，泛民飯盒會召集人梁家傑（袋巾傑）尋日就宣布，將搞個「反袋住先大行動」消毒，反「袋」派呢招只不過係箍緊支持啫，但泛民分裂戰就一觸即發，今次反「袋」分分鐘變咗反枱！
白鴿黨羅致光、狄志遠、黃成智先後表示支持對政改「袋住先」，結果受到黨內激進派猛烈抨擊。而公文袋嘅湯家驊就懶理黨內嘅死硬派，自行與一班包括學者及前高官嘅溫和民主派人士組成新論政平台，更不排除日後成為政黨。呢股勢力好快亮相，佢哋對政制發展一向持溫和、有得傾嘅態度，支持聲音更較死硬派多，所以反「袋」派都開始腳震。
袋巾傑死撐樂見其成
袋巾傑尋日雖然死撐，對溫和人士另組平台「樂見其成」，不過，呢個行動代表公文袋都分裂嚴重，唔係點會有黨員要另謀發展空間呢？
一波未平，一波又起，反「袋」派唔驚就假，所以佢哋都度定橋，話政改方案一出，就會落區擺街站宣傳反「袋住先」理念，但類似嘅活動早已有大學生自發做緊，泛民只係跟學生哥口水尾。同時佢哋又打算後日舉行記者會，聲稱要趁《基本法》頒布二十五周年之際搞啲嘢。如果真係要搞，點解又唔喺上個星期嘅二十五周年正日同官方活動打對台呢，或者泛民反「袋」派做乜都慢幾拍啩。
另外，立法會議會聯絡小組委員會尋日就同歐洲議會中國關係代表團會晤。其中德國同盧森堡嘅代表聽完泛民講選舉制度後，都叫泛民對政改袋住先，認為袋住先嘅話，日後會有更多籌碼討價還價。究竟泛民仲要執迷不悟到幾時呢？
第一手消息請下載on.cc東網
