城中鏡：林煥光急凍廚餘 環保慳膠袋
世界綠色組織日前舉辦綠色辦公室獎勵計劃頒獎禮，行政會議召集人WK林煥光做得嘉賓，綠色心得都唔少。WK透露佢同太太喺屋企撐完枱腳後，會將廚餘用膠袋包起再放入冰箱，儲足一個星期先棄置，每星期只用一個膠袋就搞掂，慳袋又環保。
林煥光（左）急凍廚餘節省用膠袋，高靜芝（右）就拒絕收花，同樣好環保。
不過，將廚餘儲埋雪一星期，乾嘅廚餘好似生果皮都還可以，但濕嘅廚餘唔怕發臭咩？WK冇講呢個問題，只係話多得環境局局長「星星」黃錦星教路喎，如果星星都係咁做，應該冇問題嘅。佢又話本來想買部廚餘處理機，可惜度完一輪位置後，都係唔夠位置擺放，惟有用急凍廚餘法先。
中央政策組全職顧問高靜芝都身體力行，拒絕收花支持環保。佢自爆拍拖時已叫男友咪送花，一來嘥錢，二來睇見鮮花凋謝，心情都跟住差，寧願收朱古力或番梘，實用好多。
