潮語「劉江華」,並唔係指呢位廢到爆炸嘅副局長,而係指垃圾桶或者垃圾!「劉江華」呢個垃圾桶嘅圖像,其實早喺佢兩年前選舉嘅時候已經喺網上出現。不過,到今時今日,尤其喺佔領區內成為咗垃圾桶嘅代名詞,就真係始料不及。

乜話?「劉江華」都係潮語?冇錯,前立法會議員,民建聯嘅劉江華的而且確係一個潮語。當然,今時今日貴為政制及內地事務局副局長嘅佢,本身並唔係潮人,以佢多年嘅從政經驗,早已經為人所熟悉,起碼比起好多黨友更早加入政圈獻世。佢喺二○一二年立法會選舉落敗,冇得做議員,落選之後,更有網民去佢辦事處「慶祝」佢冇得做議員。

點知,我哋「英明」嘅特區政府,竟然會聘請一個競選落敗,如此不受市民歡迎嘅人做副局長,每個月仲要納稅人出十幾萬畀佢,如此不合邏輯兼反智嘅事,只會喺香港發生。不過「劉江華」廢還廢,點解又會成為潮語?

事緣係,之前學聯同政府就政改談判,政府派出五人,包括政改三人組林鄭月娥、袁國強、譚志源、邱騰華同埋劉江華,與學聯秘書長同副秘書長等五位學聯同學埋枱傾。十幾萬一個月嘅「劉江華」全程陪坐,喺近兩個鐘頭嘅會談竟然可以零發言!之後有網民喺網上做咗張圖,係一個橙色街邊垃圾桶裏面有「劉江華」個樣喺裏面。

記得有一首舊歌叫《垃圾》,其中一段歌詞係:「求我做個垃圾,長留戀於你家,從沉溺中結疤,再發芽!」如果垃圾係指「劉江華同佢老細」嘅話,就希望佢哋唔好再留戀我家!多謝合作!

第一手消息請下載on.cc東網iPhone/iPad/Android/Windows Phone Apps