城中鏡：馮裕鈞接掌利豐好興奮

查實佢都係正式出任行政總裁之位六個星期，今次Spencer明顯早有準備，上個月利豐分拆利標喺港交所上市，當時Spencer已經坐正，有人問佢升職有乜感想時，佢就話剛剛接棒兩日，要「儲吓感受先」，保證八月公布業績時，再同大家分享。

只係事隔一個月啫，尋日問佢上任嘅感想，佢好有準備咁話，自己「非常興奮」，因利豐係全球最大採購企業，擁有好團體、管理層等，但市佔率仍低於百分之五，因此非常期望再上一層樓。

利豐主席馮國綸對姪兒Spencer都好照顧，講解完業績交波畀新一代接班人Spencer講業務發展時，笑晒口話「great great pleasure」。會後又話對Spencer上任表現打足一百分，大讚Spencer「靚仔過自己」。