催化器完全唔化 環保署充斥A貨

話說港府早喺一一年提出斥資一億五千萬元，資助全港石油氣的士同小巴一次性更換催化器，目的係減少路邊廢氣排放，點知一拖再拖，到今年至完成招標。本來呢，遲到總好過冇到，弊在不少小巴加裝催化器後非但冇減少排放，反而出現「耗油勁、唔夠力」嘅問題，部分催化器更因零件鬆脫而無法使用，直情係適得其反。

運輸業團體係咁講嘅，有小巴更換催化器後，唔夠三個月就死火，汽油更加係用多咗兩至三成；亦有的士更換催化器半年後，行車時速超過八十公里就死火，問你怕未。

喂，更換催化器無非都係想改善環境啫，家陣反而用多咗油，污染不減反增，你話係咪冇嗰樣整嗰樣吖。最得人驚嘅係，一旦車輛喺高速公路行行吓突然死火，隨時引發嚴重車禍，後果不堪設想。庸官環保變嘥油已經夠離譜，如果環保變殺人，責任邊個孭得起吖？

咁到底因乜解究催化器完全「唔化」？有業界人士批評，整個招標過程問題多多，中標車房實際上由一兩間公司負責；更加莫名其妙嘅係，當局好揀唔揀，竟然棄外國原廠催化器唔用，反而買入內地仿製嘅「A貨」。一分錢一分貨，呢個道理三歲細路仔都識啦，一味貪平買次貨，唔出事至奇。

咦，諗諗吓又唔對路喎，反正使嘅係公帑，又唔係掏官員自己嘅荷包，使乜同公帑慳住度住呀。所以計太一叮話齋，佢哋可能根本唔知邊款催化器性能最好，咪求求其其亂揀一通囉。

呢嗱，港產官僚不學無術鬧笑話嘅例子，真係多不勝數o架。大衞像當淫褻唔講嘞，同樣經典嘅係西九文化區大拿拿花一億七千幾萬，由外國買入一批中國當代藝術品，點知被本地藝術界質疑被人搵笨，笑大人個口。仲有喎，消防處近年買入嘅設備甩漏多多，消防車射水無力、救護車車身過高、通訊系統頻頻死機……五花八門，無奇不有，簡直沒有最醜，只有更醜，市民認真多得佢哋唔少。

咁講啦，A貨催化器固然搞到司機大佬頭痕，A貨環保官員更加令市民無眼睇。見微知著，港府大事做不來，小事唔識做，連更換催化器咁小嘅事都搞到一鑊泡，仲話「穩中求變，適度有為」喎，呃鬼咩，叮！