政壇：高達斌唔同愛港女將玩
「愛港之聲」召集人高達斌尋日獲邀出席電台節目，同「佔領中環」行動發起人戴耀廷、學聯秘書長周永康對壘，可惜大家最期待嘅激辯畫面冇出現，兩派各有各講、火花欠奉，反而「愛」字頭團體之間嘅明爭暗鬥仲好睇。隸屬愛字頭陣營嘅高達斌不但向立法會議員梁美芬建議嘅反佔中「志願軍」說不，連正義聯盟召集人李偲嫣下月搞嘅撐警遊行，高達斌都話唔使旨意有合作機會。
高達斌
李偲嫣日前宣布成立「撐警大聯盟」，下月初再搞撐警遊行。高達斌話，一直支持警方執法，但即使同李偲嫣係「同路人」都合作免談喇！佢解釋，李偲嫣一向好忌佢，擔心能力比唔上佢，大家一齊行動會被佢搶走晒啲曝光率喎；加上舊年八月嘅旺角撐警集會，雙方因錢銀問題起過爭執，所以高達斌索性好男不與女鬥，各自各開壇作法好過，難怪高達斌要喺今個星期日搶閘搞撐警遊行嘞。
