金融界有好多體育好手，恒豐證券研究部董事林家亨（Simon）早前先贏咗今年第一場羽毛球比賽，唔夠兩個月，Simon又參加咗另一場公開賽，以男子雙打組合出戰，仲同香港甲組球員對戰。最後雖然屈居亞軍，但佢話，兩個對手加埋年紀仲細過佢，雖敗猶榮啦！

林家亨落場，家人都嚟捧場打氣。

Simon今年第一贏嘅係城大嘅羽毛球比賽，然後又備戰香港文職及專業人員總會舉辦嘅羽毛球比賽，呢個比賽話明係公開賽，當然唔少得香港甲組球員啦，Simon都承認，今次比賽係個人有史以來打得最辛苦嘅一場。

佢笑笑口話︰「之前打大學比賽都無咁辛苦，今次冠軍係香港最大嘅羽毛球隊一號種子隊員，我嘅水準最多咪高丙組球員少少。而且自己今年都已經五十六歲，佢哋兩個後生仔年紀夾埋都唔夠四十五歲，搞到我一身汗水，之前都未試過打得咁辛苦。」為咗今次比賽，Simon早兩個月已經開始加緊練習，每星期打三次波。而且今場賽事係一日連打8場，真係唔容易。

第一手消息請下載on.cc東網iPhone/iPad/Android/Windows Phone Apps