尋日立法會設宴款待特首CY梁振英等一眾問責官員及行政會議成員，今次午宴比以往和諧得多。點解？因為泛民主派議員少咗好多，除咗梁國雄入獄外，亦有泛民議員杯葛午宴，加上坐主家席啲議員全部都係建制議員，所以班官員有餐安樂茶飯食吓。不過，有人就質疑點解主家席會坐晒建制議員呢？即使抽籤都好，現場仲有工聯會、兩名泛民議員，到底係真係建制抽中吖？抑或係特別安排呢？

立法會午宴上，工聯會王國興同保安局局長黎棟國握住手密密斟。

至於有出席午宴嘅泛民議員郭家麒同黃碧雲，都唔係齋坐喺度食餐飯咁順攤，郭家麒就喺午宴開始前，遞咗封爭取冇篩選普選嘅信件畀CY，而黃碧雲就遞咗封有關新界東北發展嘅請願信畀發展局局長陳茂波。至於午宴期間大家傾咗啲乜呢？據聞CY同席上嘅建制議員同行會成員史美倫講到英國一部有關國會同議員報復嘅電視劇，CY就話喺英國讀書時睇嘅，但史美倫就介紹CY睇美國翻拍嘅一齣劇，話比英國舊嗰齣更好睇喎！

第一手消息請下載on.cc東網iPhone/iPad/Android/Windows Phone Apps