歐美銀行為咗洗黑錢罪名，已經交咗唔少罰款同和解費，嚟緊仲有大筆合規費用要年年支出，摩根大通就終於頂唔順，使出一招「斬腳趾避沙蟲」，一口氣關閉晒美國以外嘅高官帳戶，總共成三千五百人受影響，一於捨棄呢批賺埋都唔夠佢畀監管成本嘅客戶。

前哥倫比亞財政部長奧坎波被提名成為下任世界銀行行長，都成為今次摩通行動嘅受害者，佢仲大動肝火，話摩通當正佢係犯，禮拜五突然凍結晒佢啲錢，感覺簡直係身處地獄。

今次摩通出手，淨係美國人可以豁免，只要係海外官員，不論前任同在職都要同佢銀行服務講拜拜，照計就算幫摩通打工嘅英國前首相貝理雅都會中招，但消息就話私人銀行客唔受影響。

其實摩通係美國最大嘅銀行都夠膽咁做，反映美國金融系統上下好有決心反洗黑錢，業界都好懷疑以後海外政治人物去美國，仲有邊間美國嘅銀行夠膽提供服務呢？

第一手消息請下載on.cc東網iPhone/iPad/Android/Windows Phone Apps