政壇：食肆唔外借廁所 張宇人呻有苦衷
早前有內地遊客嘅小朋友當街便溺被影相，進一步激化中港矛盾。有內地網民發起五一嚟香港，搞到香港遍地「黃金」，來勢洶洶，睇怕商務及經濟發展局局長蘇錦樑想將事件降溫，點知佢發表「包容論」後，又激起本地一班網民發起萬人去佢屋企門外「便溺」抗議，真係一波未平一波又起，都唔知點收科。
設計圖片及對白
再係咁落去唔係辦法，話說立法會議員阿Ann蔣麗芸日前就呼籲本港食肆開放廁所畀遊客，費事佢哋因為人有三急而求其搵個地方「方便」。不過，飲食界議員Tommy張宇人尋日就為食肆被指唔肯借廁所一事平反，話全港公廁數目寥寥可數，如果唔係飲食界樂意對外開放廁所，香港分分鐘會遍地「黃金」喎！
做好心隨時釘牌
Tommy解釋，飲食業本住「顧客至上」嘅宗旨，唔少餐廳都願意對外開放廁所，雖然有啲餐廳會喺門口貼出「洗手間恕不外借」嘅告示，但咁樣只係迫不得已。佢話當餐廳對外開放廁所，如果搞到勁污糟，衞生督察就會向餐廳東主發出告票，扣多幾次分甚至會停牌，一時好心可能未必有好結果。講到咁，Tommy都係想話業界係有苦衷啫！佢跟住就話如果旅客真係好有需要，絕大部分餐廳都會外借廁所。
作為飲食業界代表，Tommy幫餐廳講嘢似乎係理所當然，但其實佢都有借廁所嘅親身經歷，自爆當年競選時都曾經問過啲餐廳借廁所，對方亦冇拒絕過佢，所以批評阿Ann嘅言論係畫蛇添足喎！
