尋日同大家講過馬會大董葉澍堃嘅大仔日前添丁做咗爸爸，原來新世界發展主席鄭家純兒子Adrian鄭志剛近日亦再做爸爸喎，太太余雅穎上月底誕下千金Natalia，加埋之前嘅囝囝，湊成一個好字。

鄭志剛同太太余雅穎上月底添咗千金，近日大派薑醋慶祝。（資料圖片）

低調嘅Adrian未有向外宣布喜訊，但廣發薑醋畀好友，據聞煲薑醋有成一個兩磅蛋糕咁大，收到嘅人都話喜出望外。不過，暫時未知Adrian會唔會為B女擺百日宴，但好友們話，擺唔擺酒都無所謂，賀禮一樣照到。

據知，Natalia喺三月二十八號出世，重五點九磅，精靈可愛。再為人父嘅Adrian想低調啲，只印製一批粉紅色心意卡，將喜悅同好友分享，但未有公開女兒嘅照片。佢亦按照中國傳統大派薑醋，薑醋用白色煲盛載，潮味十足，食過嘅人都話薑味濃郁，豬腳炆得好腍，絕對係水準之作。

第一手消息請下載on.cc東網iPhone/iPad/Android/Windows Phone Apps