SUN搞作：打橫嚟講：官誤將「春袋」當膀胱，哈哈！

吓！咁就要請問法官，你嗰陣係讀邊間「名校」？嗰位老師叫乜水呀！

即使無人教，全個油麻地街市，或廟街的男女老幼，皆知「春袋」係乜啦！

「春袋」者，正字係「䘒袋」。「䘒」與「肉」字部的「朘」通，古書解「赤子陰」，即「男孩的生殖器」也！現今泛指「卵」，學名為「睾丸」。

「䘒袋」，書面語本為「腎囊」，通俗寫做「陰囊」，也叫「卵袋」，廣東人稱之謂「䘒袋」，香港所有報章雜誌全寫「春袋」，此乃小學三年班水平的普通常識！

「春袋」，絕不是「膀胱」。

嗱！看看《中華高級新詞典》先啦！「膀胱」，作「腹內儲尿的囊狀器官」解，睇清楚未？係「腹內」，即「體內的」，喂！官老爺，閣下的「䘒袋」，應在「體外」的吧！一個就裝生物，一個就載廢物！

在香港，批評一個庸廢的官員，是無罪的，唔知（火羅）爆一個無知的法官，會唔會畀佢告的呢？

呢位法官，唔止缺乏大眾普通常識（Commonsense），仲對廣東話有誤解（不敢話「歧視」），佢話法庭用字，應避免使用粗俗字眼，故只批准用「陰囊」一詞，即不能用證供上的「春袋」。

究竟世上邊個曾話過「䘒袋」一詞係粗俗的呢？叫佢出嚟！點解「陰囊」會優雅過「䘒袋」的呢？

嗱！咪話唔教精你呀！粵諺「正䘒袋」者，「蠢人」咁解呀！呢啲唔係性教育，而係語言學呀！膀胱人。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府