社會嘈吵不斷 香港遲早玩完

嗱，話口未完又有爭議喇。有活雞批發商促請當局盡快完成喺打鼓嶺前政府農場設立本地活雞應急分流批發點嘅工程，以免影響佢哋嘅生計。但另一方面，當地居民就批評當局懶理民意，未進行諮詢就「夾硬」開工，警告如果當局一意孤行，唔排除採取激烈行動，闖入地盤抗議。

有人要求盡快完成工程，有人抗議進行工程，公說公有理，婆說婆有理，你話究竟點搞呢？如果話嗌交已經成為香港社會嘅風土病，真係一啲冇誇張o架，今次關於活雞分流站嘅爭拗，只不過係一個縮影咋。

見微知著，回歸以來社會愈來愈政治化，政客為反而反，人人只顧眼前利益，懶理社會責任，搞到當局推動任何政策都要面對反對聲音，都會遇到阻力，喺咁嘅情況下，就算有宏圖大計，都無能為力喇。

好似擴建堆填區同興建焚化爐咁，垃圾問題迫在眉睫，本來急需解決，可惜港府動輒得咎，三堆一爐根本諗都唔使諗。

冇錯，係人都唔想將呢類厭惡性設施放喺自己後花園，地區利益同全港利益嘅矛盾，本來就難以調和，加上政客煽風點火，唯恐天下不亂，而港府又弱勢，官僚眼高手低，想唔撞板都幾難。李白話，蜀道難，難於上青天。而計太一叮話齋，港府施政簡直仲難過行蜀道喇。

呢，今時今日連起個人工泳灘都被指破壞海洋生態，覓地起樓又畀人鬧破壞環境，總之係要搞到家嘈屋閉，永無寧日。

至於講到政治爭拗，就更加無日無之，尤其係政改，雙方各有各講，劍拔弩張。反對派提出所謂三軌方案，而且堅持缺一不可；而北大人就提出「一個立場、三個符合」，擺明唔會讓步，雙方各持己見，雞同鴨講。

正所謂，無可奈何花落去。回歸前香港係繁華之地，歌舞昇平，人人安居樂業，係名副其實嘅福地；可惜回歸後不斷沉淪，經濟低迷，民生凋敝，福地變成亂地，講起真係可悲。香港搞成咁，除咗港府無能、施政混亂之外，社會愈來愈政治化就係其中一個主要原因。

禍福無門，惟人自招，車公靈籤已經提醒香港人，沉迷內耗一定冇運行。香港回歸咁耐亂足咁耐，再唔撥亂反正，遲早齊齊玩完嘅咋，叮！