名人二代不少嗜武之人，廖創興家族後人廖偉麟（Jeffrey）就係柔道好手，平日西裝骨骨嘅Jeffrey自爆六歲開始習柔道，佢笑言細個身材矮細，媽咪怕佢返學畀人蝦，批准佢學柔道，一學六年。十二歲嗰年佢已挑戰考黑帶，可惜考兩次都失敗，加上要留學加拿大，興趣都要「借歪」。

廖偉麟讀書時練得一身柔道絕技，唔怕畀外籍同學蝦。

學柔道多年，Jeffrey嘅最大滿足感來自揮低外籍同學。話說有次一位外籍同學撩交打，佢轉身將對方一嘢撻落地，動作之快，嚇到對方目瞪口呆，仲懇求唔好將被撻嘅瘀事宣揚開去喎！身懷武藝，難怪Jeffrey日前出席武術活動時手舞足蹈，興致仍濃。咁不如重披柔道袍？佢就話工作太忙，有時間都係專心投資好過。

Jeffrey話個人遊帶旺香港酒店業，有房唔憂租。旺區一帶嘅酒店房間市值過去半年升值三成，所以今年會部署再掃入精品酒店，等收租咁話。

第一手消息請下載on.cc東網iPhone/iPad/Android/Windows Phone Apps