政壇：港台延長高職繼續大花筒

呢個位原定今年五月到期，現職者係戴健文，議員對呢個撥款申請一樣意見多多，譬如質疑大樓要重新招標，但港台都只係話兩年，點解要搵個專人睇住五年？又點解要搵個高薪政務官嚟做，而唔係專業工程師？最後議員都係半信半疑，而戴健文個位嘅撥款雖然過咗一關，但距離心定晒仲好遠。

立法會資訊科技及廣播事務委員會尋日討論該兩項開位及撥款建議，由於港台同建築署未來兩年要研究縮減新大樓規模、調低造價，包括可唔可以刪減部分並非必要嘅工作同設施，將部分設施存放喺其他地方等，所以代表港台出席會議嘅商務及經濟發展局話需要保留呢個副處長職位五年，最搞笑嘅係，依家坐緊個位嘅戴健文並冇出席會議，有議員都喺會上特別問到呢件事。

質疑空降政務主任

議員發言時，有人質疑新大樓重新設計及招標只係兩年，點解個位要保留五年咁耐呢？工程界議員盧偉國更認為，如果港台保留呢個位嘅原因係新大樓工程，咁呢個位主要嘅工作就係領導興建新大樓，質疑港台點解唔搵有相關專業背景嘅人士出任，反而要由政務主任「空降」呢？

議員七嘴八舌，出席呢個會嘅商務及經濟發展局常秘何淑兒解釋，專業人士可就新大樓設計和興建提供意見，但招標工作包括很多統籌工夫、與不同單位聯繫及討價還價等，由政務主任處理較為合適，又話個位除咗處理新大樓嘅工作外，仲有其他職務，譬如負責媒體資產管理、統籌數碼地面電視輔助發射站等工作。