SUN搞作：網絡小說：來自東莞的佢

「剷走佢！冚把爛剷！家家都剷！」城管阿頭指揮道：「啲鬼佬仲話係乜鬼嘢藝術喎！就係亡我之心不死！阿叔，講！你叫乜名？」

「我……我姓曾。」

「阿頭！唔通佢就係大名鼎鼎嘅九龍皇……」城管小卒懶醒高叫，被阿頭兜巴星：「懵炳！佢過咗身啦！阿叔！你扮乜嘢九龍皇帝呀？」

「唉！」阿叔此時仰天長嘆，雙拳緊握：「朕又點止喺九龍做皇帝，港島新界、省城澳門，咪一樣係打橫行！」眾城管將信將疑，阿頭突然想起六合彩報中聲稱可以預知未來十期攪珠結果的香城知府，正是此阿叔，於是「啊」一聲，叫了出來。

「你咪就係曾雀屎？」阿頭不敢相信前朝皇帝折墮至此：「搜刮埋咁多，做咩仲要流落街頭？仲要嚟到莞城添？」

「因為做『二五仔』囉！」曾雀屎於是將遭中央流放嶺南、變相「雙規」、居無定所的事娓娓道來。「所以依家咪靠畫吓嘢打發時間，睇吓有無人揾我拍洗潔精廣告！你哋掃黃啫，唔會咁無國際視野，唔畀我畫啩？」曾雀屎無奈道。

「可惜喇，有最新指示！」阿頭聽後，含笑道：「因為性工作比起你嚟講，實在太高尚喇！兄弟，剷起佢！」