政府依家正就政改進行諮詢，政制及內地事務局局長譚志源都算做足工夫，差唔多每個界別邀請佢出席政改論壇都一定到，而且例必賣花讚花香。尋日佢出席金融界政改諮詢論壇時，依然口甜舌滑，狂擦金融界對香港有幾重要，講到好似無咗金融界唔得咁。

譚志源（左）狂擦金融界鞋，張華峰（中）好受落。右為財經事務及庫務局局長陳家強。

譚志源份人出名圓滑，雖然口才唔係特別好，但絕少講錯嘢得罪人，尋日佢出席金融界政改論壇，開場白已大讚好重視金融界，因為金融界同政改好有關係。佢解釋，金融界同政改有兩項共通點，分別係有利資本主義發展，同兼顧各階層利益，仲話呢兩項正正係一國兩制下嘅精髓，無咗呢兩點完全唔得。

佢咁大頂高帽笠落金融界，在座嘅金融人拍晒手掌，坐喺身邊嘅立法會金融服務界議員張華峰都好得戚咁挺一挺個大肚腩，威風十足，仲笑到見牙唔見眼。之不過，譚志源下下落足鞋油，下次去見式微嘅漁農業時，又應該點兜番呢？

第一手消息請下載on.cc東網iPhone/iPad/Android/Windows Phone Apps